Willkommen

Biografie

Lieder

Diskographie

Bücher

Agenda

Bildgalerie

Presse

Kontakt

Links




Ruedi Krebs: Berner Troubadour

wes chirschi git, isch summer

wes chirschi git, isch summer
wes zwätschge git, isch herbscht
we ds wasser gfrürt, isch winter
für alles git's e zyt

u ds hingerschte u ds letschte
u ds chlynschte het sy zyt
u d sunne schynt nid ewig
ou d zyt het ihri zyt

zyt vom geborewärde
ou ds schtärbe het sy zyt
es git e zyt vom pflanze
ds usrysse het sy zyt

es git e zyt vom gränne
ou ds lache het sy zyt
es git e zyt vom truure
ou ds tanze het sy zyt

es git e zyt vom sueche
ds verlüre het sy zyt
es git e zyt vom bhaute
o ds losla het sy zyt

es git e zyt vom schwyge
ou ds rede het sy zyt
es git e zyt vom gärnha
ou ds hasse het sy zyt

me tuet sech mängisch myde
ds umarme het sy zyt
es git e zyt vom stryte
dr fride het sy zyt

wes chirschi git, isch summer
wes zwätschge git, isch herbscht
we ds wasser gfrürt, isch winter
für alles git's e zyt


zurück zur Übersicht